ജീവിത യാത്രയിലൊരു കൌതുകം തോന്നി
ആത്മാര്ത്ഥ സുഹൃത്തിനെത്തേടാനായി
തെരച്ചില് തുടങ്ങും മുന്പേ തന്നെ
മനസ്സില് കല്പ്പനകള് ഉദിച്ചുയര്ന്നു
കല്പ്പനകള് ഭാവനയില് തെളിഞ്ഞു വന്നു
സാഗരത്തിനേക്കാള് എന്നില് ആഴമേറിയ വിശ്വാസം
സാനിധ്യത്താല് പനിമതിയുടെ ശീതള ആശ്വാസം
പാപന്ധകാരത്തെ വെളിപ്പെടുത്തുന്ന ദീപനാളം
സ്വത്വചിന്തയ്ക്ക് ഉതകുന്ന ദീപസ്തംഭം
സുഖ ദുഃഖ വേളകളില് നിഴലായും
ഏകാന്തത കാംക്ഷിക്കും വേളയില്
പ്രകാശം കൈവിട്ട നിഴലായും
അസൂയയും മാത്സര്യ ബുദ്ധി യില്ലാത്ത ചിത്തത്തോടെ
നേരമ്പോക്കിലും ചിന്താശക്ത്തിക്ക്
ഊര്ജ്ജമേകും വൈദ്യുതിയായി
പ്രലോഭനങ്ങളില് മഞ്ഞളിക്കാത്ത മിഴികള് വേണം
ഫലിതങ്ങള് കേള്ക്കാനും പറയാനും പാടവം വേണം
സ്വകാര്യതയില് മാത്രമാകണം പരിഹാസം
സംഭാഷണ സാരാംശം ഒരേപോലെ ഗ്രഹിക്കണം
കുറ്റപത്രങ്ങള് നേര്ക്കുനേര് തുറക്കണം
മുന്നില് സ്തുതിയും പിന്നില് ദുഷിക്കാനും പാടില്ല
അനുഭവം പങ്കിടും വേളകളില് താരതമ്യം പാടില്ല
മനസ്സു തുറക്കാനും രഹസ്യ നിധി സൂക്ഷിക്കാനും നല്ലഖജനാവ്
പ്രത്യുപകാരം കാംക്ഷിക്കാത്ത നല്ല പരോപകാരി
ഹിതത്തെ വേദനാരഹിതമായി ബോധ്യപ്പെടുത്തുന്ന മിത്രമായി
വികാര വിക്ഷുബ്ദ്ധിയിലുതിരുന്ന വാക്കുകളെ
ശ്രവിക്കാനും ക്ഷമിക്കാനും തോന്നീടേണം
മെല്ലെ ഭാവനയില് നിന്നും ഉണര്ന്നു ഞാന്
മുന്വിധിയാല് മൂടിയ മനസ്സ് മന്ത്രിച്ചു മന്ദഹസിച്ചു
എല്ലാം ഒത്തൊരു സുഹൃത്തിനെ കണ്ടു കിട്ടുമോ?
തത്ക്ഷണം തന്നെ ഗുരു എന്നില് പാകിയ
ചിന്താബീജം പൊട്ടി മുളച്ചു
പ്രതീക്ഷകള് പുലര്ത്തി യാചകിയായി
സംസാര ചക്രത്തിലുഴന്നീടാന് തയാറായോ?
അന്തര്യാമിയായ നിന് ആത്മ സുഹൃത്തിനേക്കാള്
ഉത്തമ സുഹൃത്താരുണ്ടീ ഭുവനത്തില് ?
No comments:
Post a Comment